افضل نوع طاسة للقلي وأفضل أنواع الحلل وصواني الفرن

كل بنت بتجهز بتكون في حيرة وسط كم الماركات وأنواع الحلل والطاسات، وبين الحاجات الأساسية اللي متقدرش تستغنى عنها وتعيش معاها لأطول فترة ممكنة وبين الحاجات اللي مش ضرورية، علشان كدا هقولك على الحاجات الأساسية وإيه أفضل الماركات ومميزات وعيوب أنواع الطاسات والحلل وصواني الفرن علشان تختاري الأفضل في مطبخك.

افضل نوع طاسة للقلي وأفضل أنواع الحلل وصواني الفرن

متوفرين في محلات مستلزمات المطابخ بأنواع كتير، لكن أهمهم سبع أنواع وأشهرهم: –

• التيفال
• الستانلس ستيل
• الصاج
• الألومنيوم
• الأركوبال
• السيراميك
• البايركس
• الجرانيت
• تافلون

أكيد مش ممكن تجيبي كل الأنواع دي لكن على الأقل هتجيبي نوعين تستخدميهم دايما مش أكتر من كدا، لأن مصيرهم هيكون الركنة وتكلفة مادية على الفاضي.

هقولك دلوقتي على مميزات وعيوب كل نوع

التيفال

مميزاته طبعًا أهم حاجه بتميزه أن الأكل مش بيلزق فيه وسهل الغسيل والتنظيف.

عيوبه أنه لو أتخدش أو أتجرح بيكون مضر والطبقة اللي بتغطيه بتتفاعل مع الاكل علشان التعامل معاه لازم يكون بحذر على أد ما تقدري، والأفضل إنك تستخدمي سبتيولا سيليكون أو معلقة خشب أو تيفال وأنتي بتقلبي والأكل والتنضيف يكون بأسفنجة ناعمة.

أفضل أنواع التيفال

• سافلون التركي
• أرشيا الالماني
• زهران

لو اخترتي التيفال أنصحك بالسافلون التركي على الرغم من أرشيا الألماني أفضلهم من حيث الجودة لكن الأصلي مش هتلاقيه بسهولة التقليد هو اللي منتشر جدا والصيني كتيير، علشان كدا خليكي في المتوفر ومضمون برضو زي السافلون التركي وزهران، وفي رأيي الشخصي التركي أفضل من زهران.

أفضل الماركات

• فالز التركي
• بارديني الإيطالي

الأحسن ما بينهم طبعًا الإيطالي، لكنه غالي جدا فالز التركي أسعاره تعتبر معقولة، لكن أغلى من سافلون التركي 30 جنية مثلا على كل قطعة.

الستانلس ستيل

طبعا دا أشهر نوع من أيام جدادتنا وطبعا أحسن من الألمونيوم، لأنه عملي وبيعيش.

أفضل ماركاته

• المصانع الحربية
• زهران

وأنصحك أنه لازم يكون ف مطبخك ويكون من المصانع الحربية، لأنها بتصنعه بأعلى جودة الحلة بتكون تقيلة والقاعدة سميكة كمان متركبلة قاعدة إضافية منفصلة مصنوعة من الألمونيوم من بره ودي حاجة كويسة، لأن كدا بتضمني أن الحرارة بتتوزع صح والأكل يستوي مظبوط وميتحرقش ولا يشيط.

استانلس المصانع الحربية ممتاز في كل حاجه سواء في الجودة أو السعر، لأنه اقل من سعر زهران بفرق كبير قريب من نص التمن تقريبًا وبعد تجارب ناس كتير يعتبر أفضل من زهران.

الألمونيوم

النوع دا منصحكيش باستخدامه بالمرة لأن من الناحية العلمية وصحيًا مضر جدًا لأنه بيتفاعل مع الأكل،
لكن إذا كنتِ مضطرة تجبيه فأفضل ماركاته:

• الدهان شيف
• الأهرام
• المصانع الحربية.

الجرانيت

ودا نوع زي السيراميك لكن أحدث منه تقريبا مفيهوش عيوب كتير، غير أنه بياخد وقت على ما توصله الحرارة كمان مش بيفقد الحرارة بسهولة وفيه منه أنواع كتير زي:

• سافلون التركي
• البرتو التركي
• فاليز التركي
• كوركماز التركي
• ارشيا الألماني
• بدريني الايطالي
• الجرانيت الكوري

جرانيت نيوفلام الكوري

النوع دا هو الأفضل على الأطلاق لأنه بيتحمل درجة حرارة الفرن، واللي ممكن توصل لـ 250 درجة مئوية والطقم منه بيتكون من حلتين حلة مقاس 24 سم وحلة مقاس 20 سم مع غطا بايركس، و3 طاسات منهم واحدة جريل مقاس 28 سم والطاستين التانيين مقاس 24 سم و20 سم.

مميزات الجرانيت التركي

حسب الجودة السافلون أفضلهم، يليه الكوركماز بعده البرتو وفي النهاية الفاليز.

السافلون الأحسن لأنه بيتحمل درجات الحرارة المرتفعة من غير ما يحرق الأكل، كمان بيتكون من طبقات فوق بعض من المعادن علشان يضمن متانة وصلابة الحلة.

جرانيت أرشيا الألماني

يعتبر هو كماه من أفضل أنواع الجرانيت وبيوفرلك طقم مكون من 4 حلل بمقاسات 16، 20، 24، 28سم مع غطا بايركس، و2 طاجن مربع مع الغطا مقاسات 20 سم و24 سم، وطاسة بالغطا مقاس 24 سم طقم توزيع سليكون.

ممكن تشتري الطقم كامل على بعضه أو تشتري على حسب احتياجك، وعلى حسب المقاس والحجم اللي عايزاه.

البايركس والأركوبال

النوع دا يعتبر من أفضل الانواع الصحية، دا غير شكلها الشيك والجميل بس عيبها الوحيد من وجهة نظري أنها مش بتعيش ومش معمرة.

أفضل ماركاته

البايركس الفرنساوي هو أفضل نوع ومعمر أكتر بالنسبة للأنواع التانية.

الصاج

أما النوع ده فمنصحش بيه خالص ومالوش أي أهمية، ولو كنتي هتختاريه بغرض تخزين الأكل في الثلاجة فالافضل تختاري علب البلاستيك الصحية زي التايبر وير.

أنواعه

الصاج المطلي بالتيفال

هو كمان مالوش أهمية لأنك هتجيبي تيفال أو سيراميك بكده هيكون مالوش لازمة، دا غير أنه بيتقشر بسرعة ومش معمر أقصى مدة هتكون سنة واحدة علشان كدا منصحكيشش بيه نهائي.

طبعا دلوقتي بتسألي ايه الحلل وصواني الفرن المهم إنك تجبيها

1. زي ما قولتلك من شوية طقم حلل الاستانلس ستيل للمصانع الحربية لا غنى عنه، وبيتكون من خمس قطع مقاس 16، 20، 24، 26، 28سم، لان المقاسات دي بس المتوفرة عندهم، كمان متنسيش كزرولة استانلس مقاس 22سم.
2. اشتري 3 حلل سيراميك مقاس 20، 24، 28سم من ماركة بارديني الايطالي أو فالز التركي ولو مالقيتهاش بلاش التيفال، لأن السبراميك صحيًا أفضل غير انه زي التيفال تمام من حيث إنه الاكل مش بيلزق فيه وسهل الغسيل والتنظيف ونفس المعاملة لكن التيفال لو اتجرح خلاص بتكون الحلة او الطاسة او الصينية غير صالحة للاستخدام، ومينفعش تستخدميها تاني أبدًا لأن لا قدر الله ممكن تسبب سرطان.
3. كمان خلي بالك إن فيه أنواع بتكون مطلية سيراميك، ودي بتقشر بسرعة وبتكون تقليد للسيراميك الأصلي.

صواني الفرن

1. هاتي طقم ألمونيوم مدور ومستطيل.
2. طقم صواني بيتزا فخار، لأنه بيخلي البيتزا أحلي بكتير في التسوية عن الانواع التانية.
3. طقم صواني بايركس مستطيل أو بيضاوي وابعدي عن الصواني التيفال، لأنها بتتجرح بسرعة ومش عملية لأن معظم الأكلات اللي بتحتاج الفرن بتحتاج للتقطيع، وده هيخليها عرضة للخدش.
4. 2 طاجن من الفخار بأحجام مختلفة واحد كبير وواحد متوسط، وست برامات فخار صغيرة للحلويات.

الطاسات

هاتي 2 طاسة سيراميك مقاس 30 و18 سم مقاس سم30 لقلي البيض لعمل الكريب، وهكذا أما مقاس 18 سم للتقلية بتاعت التوم مثلًا ولو عايزة طاسات، كمان هاتي مقاس 26 سم أو اتنين مقاسات مع دول كفاية جدا.

نصيحة أخيرة اتأكدي من أن المنتجات اللي بتشتريها أصلية ومصنوعة من خامات جودتها عالية، بحيث ميكونش فيها معادن تقيلة زي الرصاص والكادميوم في الدهان الداخلي للحلة، كمان ابعدي عن الحلل الرخيصة لأنها بتكون مش أصلية وغير صحية والطبقة الخارجية بتقشر بسرعة وعلى الأغلب بيكون معدن الحلة الومنيوم وخطر على الصحة لأنه بيتفاعل مع الأكل، كمان أتأكدي من بلد المنشأ ومن لوجو الشركة علشان تضمني إنك اشتريتي المنتج الصح.

قد يهمك أيضًا: انواع حلل الطبخ المختلفة ومميزات وعيوب كل نوع ونصائح لإختيار النوع الأنسب

أو أنواع صواني تحضير و تقديم الطعام و طرق استخدامها و الأفضل فيما بينها